Усё пачалося з роднай, 45-ай, школы…
У сувязі з гадавінай пачатку Другой сусветнай вайны клуб ЮНЕСКА “Прадслава” правёў у верасні і кастрычніку серыю заняткаў у некалькіх навучальных установах Віцебска і Віцебскага раёна. Першай “ластаўкай” у серыі мерапрыемстваў пра векапомныя падзеі стала сустрэча ў сёмым класе школы № 45.
Гэты занятак праводзіўся па методыцы “роўны навучае роўнага”. Дзевяцікласнікі сш № 45 Цімур Буйко, Аляксей Васільеў і Аляксандр Вячэрскі пад кіраўніцтвам журналіста Юрыя Сцяпанава і куратара клуба ЮНЕСКА Ніны Каўпак распавялі аб няпростых (а іншым разам і надзвычай пракручастых) пытаннях ваеннай гісторыі. На пачатку вядучыя пазнаёмілі сямікласнікаў з важнымі эпізодамі гіганцкай бойні, у арбіту якой уцягнулася большасць краін і народаў. На дошцы былі прымацаваны карты і сцягі краін антыгітлераўскай кааліцыі і дзяржаў Восі, фотаздымкі баявых эпізодаў. Дэманстраваліся партрэты асобаў, якія паўплывалі на хаду гісторыі…
І вось настаў момант праверкі ведаў – віктарына. Пры дапамозе пытанняў, якія, дарэчы, былі распрацаваны пры актыўным удзеле дзевяцікласнікаў, вядучыя выявілі ў сямікласнікаў ступень засвоенасці новага матэрыялу, ацанілі крытычны погляд на падзеі Другой сусветнай… А суддзя – старшакласніца са школы № 31 Вікторыя Шаўцова – тымчасам нястомна працавала, бо перад ёй стаяла адказная задача: вызначыць найлепшых.
У выніку гран-пры – кнігу пазлаў “Бітва за Англію” (пра шматмесячную паветраную вайну над Брытанскімі астравамі ў 1940 годзе) – атрымаў Мікалай Нядзвецкі. Як адзначыла яго маці, настаўніца школы № 45, Коля цікавіцца пытаннямі гісторыі і часта бавіць вольны час, чытаючы літаратуру на гэтую тэму. Іншым двум дзецям былі ўручаны ўзнагароды ў намінацыях “За актыўнасць” і “За ўважлівае слуханне”.
Трэба зазначыць, што, каб мерапрыемства адбылося цікавым і даходлівым (бо вучні 7 класа гэты перыяд яшчэ зусім не вывучалі), была праведзена немалая падрыхтоўчая праца: анкетаванне з мэтай папярэдняга выяўлення ведаў (а іх, на жаль, практычна не было!) ды кансультацыі для старшакласнікаў, якія потым выступілі ў ролі трэнераў і журы.
Заняткі ў сш № 45 ды іншых школах праводзіліся ў межах міжнароднага праекта “Пераадольваючы бар’еры стэрыятыпаў: маладым беларусам пра польскі ўдзел у ІІ сусветнай вайне”.
Інфармацыйна-краязнаўчы сектар клуба ЮНЕСКА “Прадслава”
Чытайце таксама:
Каментаваць
Даведайцеся дзякуючы праекту Пераадольваючы стэрыятыпы: маладым беларусам пра польскі ўдзел у ІІ сусветнай вайне пра гераічную абарону Польшчы, падпольную рэспубліку Арміі Краёвай і дывізію імя Касцюшкі пад чырвонымі штандарамі, трагічнае паўстанне ў паўразбуранай Варшаве і легендарную армію генерала Андэрса, што ўнесла вялікі ўклад у агульную Перамогу народаў Еўропы над фашызмам.
| © Праект "Маладым беларусам пра польскі ўдзел у ІІ сусветнай вайне", 2009-2011 | Выкарыстанне матэрыялаў
Cтворана на Wordpress | Дызайн Elegant Themes |
|
