Мінулы конкурс

Конкурс адбыўся – шчаслівыя пераможцы!

Конкурс ладзіцца Беларускай рэдакцыяй Польскага радыё для замежжа і недзяржаўнымі арганізацыямі Віцебска і Гданьска з нагоды 70-годдзя пачатку ІІ сусветнай вайны. Ён будзе праходзіць у тры месячныя этапы. Першы з іх адбудзецца цягам чэрвеня. Другі этап пройдзе ў ліпені. Трэці – у жніўні.

Пасля кожнага з этапаў 5 пераможцаў атрымаюць цікавыя ўзнагароды, у тым ліку гран-пры – радыёпрыёмнік з рознымі дыяпазонамі (і з кароткімі хвалямі таксама). Чакаецца, што вынікі першага этапу будуць абвешчаныя па радыё 10 ліпеня. Пераможцы другога стануць вядомыя 7 жніўня. Прызёры апошняга этапу будуць названыя ў "Рэдакцыйнай пошце" ПР для замежжа 11 верасня.

Апроч таго, прынамсі адна асоба, якая паспяхова справіцца з усімі трыццаццю пытаннямі і заданнямі конкурсу, за кошт арганізатараў паедзе ўвосень 2009 года ў Польшчу. Мяркуецца, што яна цягам некалькіх дзён наведае сталіцу і марское ўзбярэжжа.

Усе ўзнагароды фундуюцца ў межах міжнароднага грамадскага праекта "Пераадольваючы бар’еры стэрэатыпаў: маладым беларусам пра польскі ўдзел у II сусветнай вайне", які рэалізуецца пры дапамозе Міністэрства замежных спраў РП.

I конкурсны этап:

1. Калі пачалася і завяршылася Другая сусветная вайна?
2. Якія тры краіны здзейснілі акт агрэсіі ў дачыненні да Польшчы ў верасні 1939 года?
3. На якія дзяржаўныя ўтварэнні ажыццявілі напад германскія войскі 1 верасня 1939 года?
4. Пералічыце назвы ўсіх 9 армій і прынамсі адной аперацыйнай групы, якія абаранялі Польшчу ў верасні 1939 года.
5. Чым вядомае Вестэрплятэ?
6. Назавіце імя вядомага беларускага пісьменніка, які ў складзе марской пяхоты Войска Польскага ў 1939 годзе абараняў Гдыню.
7. Дзе і колькі часу адбывалася найбуйнейшая бітва вераснёўскай кампаніі?
8. Якая польская крэпасць працяглы час абаранялася ў верасні 1939 года?
9. Распавядзіце пра польскую абарону Варшавы, Львова і Горадні.
10. Колькі польскіх грамадзян загінулі, былі паранены і ўзяты ў палон падчас ваенных аперацый вераснёўскай кампаніі?

II конкурсны этап:

1. Як называлася дзяржаўнае ўтварэнне, якое заснавалі гітлераўскія захопнікі на польскай тэрыторыі, не далучанай да "трэцяга рэйху"?
2. Назавіце не менш за тры канцэнтрацыйных лагеры, арганізаваных германскімі акупантамі на тэрыторыі колішняй ІІ Рэчы Паспалітай.
3. Якую палітыку вялі германскія акупацыйныя ўлады ў дачыненні жыдоўскага насельніцтва польскіх земляў?
4. Сімвалам гераізму польскага народа стаў Максіміліян Кольбе. Чаму?
5. Раскажыце, чым вядомая Катынь у гісторыі Другой сусветнай вайны.
6. Дзе размяшчаўся польскі эміграцыйны ўрад падчас Другой сусветнай вайны?
7. Які ўдзел узялі палякі ў змаганні антыгітлераўскіх сіл у Нарвегіі?
8. Назавіце месцы баявой славы польскіх салдат у Афрыцы.
9. Чым вядомае Монтэ-Касіна ў гісторыі Другой сусветнай вайны?
10. Якія краіны вызваляла 1 танкавая дывізія пад камандаваннем польскага генерала Станіслава Мачэка?

III конкурсны этап:

1. Які ўдзел узялі палякі ў “бітве за Англію” ў 1940 годзе?
2. У баях за тэрыторыю якога французскага пратэктарата ў Афрыцы ўдзельнічаў польскі ваенна-марскі карабель “B?yskawica”?
3. Распавядзіце пра жыдоўскі супраціў падчас нямецка-фашысцкай акупацыі II Рэчы Паспалітай.
4. Якія вынікі мела Крымская канферэнцыя ў дачыненні да Польшчы?
5. Што такое АК?
6. Распавядзіце пра Варшаўскае паўстанне.
7. Што такое арышт “шаснаццаці”?
8. Паведамце даты заняцця войскамі антыгітлераўскай кааліцыі наступных гарадоў: Люблін, Варшава, Лодзь, Кракаў, Быдгашч, Познань, Кольберг, Гдыня, Данцыг, Брэслаў.
9. Назавіце сталіцы дзяржаў, якія разам з Савецкай Арміяй занялі часткі Войска Польскага.
10. Колькі грамадзян ІІ Рэчы Паспалітай знішчылі падчас ІІ сусветнай вайны гітлераўскія і сталінскія акупанты?

Каб Ваша праца хутчэй трапіла на конкурс, калі ласка, дасылайце свае адказы на беларускую абаненцкую скрынку Польскага радыё для замежжа: а/с 45, г. Віцебск, 210015.